ಫೆಬ್ರವರಿ ೨೧, ೨೦೧೨ – ಸಂಯುಕ್ತ ಕರ್ನಾಟಕ ಅಂಕಣ
ಮಾರ್ಚ್ ೧೯೮೯ ರ ಮಾರ್ಚ್ ೧೩ ರಂದು ಟಿಮ್ ಬರ್ನರ್ಸ್–ಲೀ ಪ್ರತಿಪಾದಿಸಿದ ಹೊಸದೊಂದು ತಂತ್ರಜ್ಞಾನದ ಆವಿಷ್ಕಾರ ಇಡೀ ಜಗತ್ತಿನ ದಿಕ್ಕನ್ನೇ ಬದಲಿಸಿತು. ಮಾಹಿತಿಯನ್ನು ಇತರರೊಡನೆ ವಿದ್ಯುನ್ಮಾನ ವಿಧಾನದಲ್ಲಿ ಹಂಚಿಕೊಳ್ಳಲು ಮುನ್ನುಡಿ ಬರೆದ ಈ ಆವಿಷ್ಕಾರ ಮಾಹಿತಿ ತಂತ್ರಜ್ಞಾನ ಯುಗದ ಆರಂಭಕ್ಕೂ ನಾಂದಿ ಹಾಡಿತು. ಯುರೋಪಿಯನ್ ಆರ್ಗನೈಸೇಷನ್ ಫಾರ್ ನ್ಯೂಕ್ಲಿಯರ್ ರಿಸರ್ಚ್ (CERN) ತಂತ್ರಜ್ಞಾನ ಕ್ರಾಂತಿಯನ್ನು ಚಿಗುರಿಸಿದ ವರ್ಡ್ ವೈಡ್ ವೆಬ್ ನ ಹುಟ್ಟುಹಬ್ಬವನ್ನು ಮಾರ್ಚ್ ೧೩ ರಂದು ಆಚರಿಸಿತು. ಇಂಟರ್ನೆಟ್ ಇಲ್ಲದಿದ್ದರೆ ಇಂದೂ ಕೂಡ ನಾವು ಪರಲೋಕದಲ್ಲಿ ಪರದೇಶಿಯಾಗೇ ಇರಬೇಕಾಗ್ತಿತ್ತೋ ಏನೋ. ಇವತ್ತು ಕನ್ನಡಿಗ ಕುಂವೆಪುರವರ ವಿಶ್ವಮಾನವ ಸಂದೇಶ ಓದಿಕೊಂಡು ಕುಂತಲ್ಲೇ ಕನ್ನಡದ ಬೆಳವಣಿಗೆಗೆ, ಮನುಜಮತದ ಒಳಿತಿಗೆ ಕೆಲಸ ಮಾಡಲು ಅಗುತ್ತಿರಲಿಲ್ಲ. ಇಷ್ಟೆಲ್ಲಾ ಸಾಧ್ಯವಾಗಿಸಿದ ಇಂಟರ್ನೆಟ್ ನ ಬಗ್ಗೆ ತಿಳಿಸಿಕೊಡಲು ಈ ಲೇಖನ.
ಇಂಟರ್ನೆಟ್ ಮತ್ತೆ ವರ್ಡ್ ವೈಡ್ ವೆಬ್ ಈ ಎರಡು ಪದಗಳ ಬಗ್ಗೆ ಸ್ವಲ್ಪ ತಿಳಿದುಕೊಳ್ಳೋಣ. ಇಂಟರ್ನೆಟ್ ಬಳಕೆ ಶುರುವಾಗಿದ್ದು ೧೯೫೦ ರಲ್ಲಿ. ಇದು ಒಂದೊಕ್ಕೊಂದು ಬೆಸೆದುಕೊಂಡಿರುವ ನೆಟ್ವರ್ಕ್ ಗಳ ಒಂದು ಜಾಲ ಅಂತ ಹೇಳಬಹುದು. ಈ ಒಂದು ಜಾಲದಲ್ಲಿ ಡಾಟ (Data) ಪ್ಯಾಕೆಟ್ ಗಳು ಸಂಚರಿಸುತ್ತವೆ. ಈ ನೆಟ್ವರ್ಕ್ ಸಂವಾದಕ್ಕೆ ಸಿಸ್ಟಂಗಳಲ್ಲಿ ಇಂದು ನಾವು TCP/IP Protocol (ನೀತಿ ನಿಯಮ) ಗಳನ್ನು ಬಳಸುತ್ತೇವೆ.
ವರ್ಡ್ ವೈಡ್ ವೆಬ್ ಅನ್ನೋದು ಇದಕ್ಕಿಂತ ಸ್ವಲ್ಪ ಭಿನ್ನ. ಮಾಹಿತಿಗಳನ್ನು ಒಳಗೊಂಡ ಅಸಂಖ್ಯಾಂತ ಸರ್ವರ್ ಗಳ ನೆಟ್ವರ್ಕ್ ಆದ ವೆಬ್, ತನ್ನಲ್ಲಿರುವ ಮಾಹಿತಿಯನ್ನು ಇಂಟರ್ನೆಟ್ ನ ಮೂಲಕ ಇತರೆ ತಂತ್ರಾಂಶಗಳು ಅಂದರೆ ಬ್ರೌಸರ್ ಇತ್ಯಾದಿ ಓದಲಿಕ್ಕಾಗುವಂತಹ ಒಂದು ವಿಶೇಷ ವಿನ್ಯಾಸದ ಕಡತವಾಗಿ(File) ಎಲ್ಲರೊಂದಿಗೆ ಹಂಚಿಕೊಳ್ಳಲು ಅನುವು ಮಾಡಿಕೊಡುತ್ತದೆ.
CERN ನಲ್ಲಿ ಕೆಲಸ ಮಾಡುತ್ತಿದ್ದ ಜನರ ಮಾಹಿತಿಯನ್ನು ಅಲ್ಲಿನ ಎಲ್ಲರಿಗೂ ದೊರೆಯುವಂತೆ ಮಾಡಲು ಸಿದ್ಧಪಡಿಸಿದ ವೆಬ್. ಇದು ಈಗ ಎಲ್ಲರ ಲೆಕ್ಕಾಚಾರಗಳನ್ನು ಮೀರಿ ಜಗತ್ತಿನ ಕಾಲುಭಾಗ ಜನರಿಗೆ ಅವರ ಬುದ್ದಿಮತ್ತೆಗೆ ನಿಲುಕುವಂತಹ ಎಲ್ಲ ಕೆಲಸಗಳನ್ನು ತನ್ಮೂಲಕ ಮಾಡಬಹುದು ಅನ್ನೋದನ್ನ ತೋರಿಸುತ್ತಲೇ ಬಂದಿದೆ. ಈ–ಮೈಲ್ ಕಳಿಸುವುದು, ಚಾಟ್ ಮಾಡುವುದು, ತಮ್ಮಲ್ಲಿರುವ ಮಾಹಿತಿಯನ್ನು ಇತರರೊಂದಿಗೆ ಅವರದೇ ಭಾಷೆಯಲ್ಲಿ ತಿಳಿಸುವುದಿರಬಹುದು, ಕಲಿಕೆ, ಮನೋರಂಜನೆ, ಫೈಲುಗಳನ್ನು ಹಂಚಿಕೊಳ್ಳುವುದು, ತಂತ್ರಾಂಶಗಳ ಹಂಚಿಕೆ ಇತ್ಯಾದಿಗಳ ಜೊತೆ ನಲ್ಲ ನಲ್ಲೆಯರ ಡೇಟಿಂಗ್ ಕೂಡ. ಇದಕ್ಕೆ ನೀವು ನಿಮ್ಮದೇ ಆದ ಅಂಶಗಳನ್ನೂ ಸೇರಿಸಿಕೊಳ್ಳ ಬಹುದು. ಇದಿಷ್ಟೇ ಅಲ್ಲ ಈ ಪಟ್ಟಿ ಬೆಳೆಯುತ್ತಲೇ ಇದೆ.
ಇಷ್ಟೆಲ್ಲಾ ಮಾಡಿರುವ ವೆಬ್ ತನ್ನ ೨೦ ವರ್ಷಗಳಲ್ಲಿ ಜಗತ್ತಿನ ಜ್ಞಾನ ಭಂಡಾರವನ್ನೇ ತನ್ನಲ್ಲಿ ಅಡಗಿಸಿಕೊಂಡಿದೆ. ಜಗತ್ತಿನ ಅನೇಕರ ದೈನಂದಿಕ ಕಾರ್ಯಚಟುವಟಿಕೆಗಳ ಕಚೇರಿ ಕೂಡ ಇದಾಗಿದೆ. ಇದು ಒಂದಿನಿತು ಮುನಿಸಿಕೊಂಡರೆ ಇಂದಿನ ಮಾನವ ಜನಾಂಗಕ್ಕೆ ಆಗಬಹುದಾದ ನಷ್ಟ ಮಿಲಿಯಾಂತರ ಡಾಲರ್ ಗಳಷ್ಟು.
CERN ಶುಕ್ರವಾರ ಹದಿಮೂರರಂದು, ತನ್ನ ಕೆಲಸಗಾರನಾದ ಬ್ರಿಟನ್ ನ ಟಿಂ ಬರ್ನಸ್ ಲೀ (Tim Berners-Lee) ೧೯೮೩ ರ ಇದೇ ದಿನ ಮಂಡಿಸಿದ್ದ Universal linked information system ಮುಂದೆ, ೨೦ ವರ್ಷಗಳ ಸುದೀರ್ಘ ಅವಧಿಯಲ್ಲಿ ವರ್ಡ್ ವೈಡ್ ವೆಬ್ ದೈತ್ಯವಾಗಿ ನಮ್ಮ ಮುಂದಿರುವುದನ್ನು ನೆನಪಿಸಿ ಕೊಟ್ಟಿದೆ. ತನ್ನಲ್ಲಿನ ಮಾಹಿತಿಯ ನಿರ್ವಹಣೆಯನ್ನು ಉತ್ತಮ ಪಡಿಸಲಿಕ್ಕೆ CERN ಸಿದ್ಧಪಡಿಸಿಕೊಂಡ ವೆಬ್ ಅನ್ನೋ ಸಿಸ್ಟಂ ಮತ್ತು ತಂತ್ರಾಂಶ ಅಲ್ಲಿ ಇಂದಿಗೂ ಕೆಲಸಗಿಟ್ಟಿಸಿಕೊಳ್ತಿರೋ ಸಾವಿರಾರು ಜನರ ಸಂಪರ್ಕಕ್ಕೆ, ಮಾಹಿತಿ ತಂತ್ರಜ್ಞಾನದ ಪರಸ್ಪರ ಹಂಚಿಕೆ ಇತ್ಯಾದಿಗಳಿಗೆ ಬೆನ್ನ್ನೆಲುಬು.
ಬರ್ನಸ್ ಲೀ ಪ್ರತಿಪಾದಿಸಿದ ಅನೇಕ ವಿಷಯಗಳಲ್ಲಿ ಕಂಪ್ಯೂಟರಿನ ಆಪರೇಟಿಂಗ್ ಸಿಸ್ಟಂ ಇತರೆ ಆಪರೇಟಿಂಗ್ ಸಿಸ್ಟಂಗಳೊಡನೆ ದೂರದ (ರಿಮೋಟ್)ಪ್ರದೇಶದಿಂದಲೇ ಸಂದೇಶ ವಿನಿಮಯ ಮಾಡಿಕೊಳ್ಳುವಂತಾಗಬೇಕು ಅನ್ನುವ ಅಂಶವು ಸೇರಿತ್ತು.
